21. MNL "VUKOMERIČKE GORICE 2024."

Leptiri i Zgubidani su otprli ovaj naš nogoloptački dan. I kak je na početku zgledalo, to bu katastrofa za Zgubidane. Leptiri navalili i za par minuti je tri razlike. I staju. Leptiri. A Zgubidani nisu još ni krenuli. Sad oni krečeju i budiju se. Malo po malo, golček sim, golček tam, pak golček tam i evo nas u egalu. Leptiri u panike, Zgubidani, podržani sa hiljadu, ma kojih hiljadu, stotinama, grla svojih pratitelja nasrću i navaljuju sa svih strana nebili zeli celi plijen. A Leptiri su preiskusni da se nebi zaprli i iz jedne gluposti zabili golčeka, umirili svoja kapu Števu i otpelali se bodeke na svoj konto.

Lani je to bila šalamala za Šumare. Sad je to veliki derbi. Ovaj put su im se gače dobrano tresle. Se ze Šike kaj more hoditi i igrati je došlo. I Kumek z Kojzače. Jaka tekma, jaki tempo, dobar hakl i poprilično neuroze na jedne i druge strane. Klupe su žifčane, naravno bespotrebno, jer si pomoči nemreju, moreju samo odmoći. Nekak se ta reza menja, sad vodiju jeni, sad vodiju drugi, onda se događa teška povreda kolena tate Shakija koji veli ono kaj nesmo šteli čuti: za ovo leto je to od mene. Šok u Redovima Futačkih sinova nesreće. Ali Tihi pronalazi unutarnje rezerve i sa svojom mladosti i kvalitetom do zadnjega časa drži u napetosti celu tekmu. Ipak, previša propuha u obrane se nemre anulerati.

Maksimalno oslabljeni Ribiči imali su velike šanse protiv Šoferof guknuti tucet. Ipak, i ovak je dosta.

Još jen derbi. Trdi derbi. Badelovi manekeni oslabljeni da bole nemreju biti, Ilovača kompletna, skoro, ne bilo Meseca. Lua na golu proba glumiti golmana i dobro glumi samo kaj slabo brani, a negovi dečaki naprvo ne uspijevaju baš prederati Miku tak lako. Bez obzira na sve, kvalitetna predstava, dobar nogomet, promjene rezultata i raspoloženaj maksimalne, i na terenu i u gledalištu, tak da tekma nije razočarala. Sretnija je na kraju priče Ilovača koja je uspela zmagati, a Manekenima ostaje putokaz da mogu i bez toga brankara, ako ga baš nema.

Divovi već dosta dugo nesu osvojili bodeka protiv Kristušof tak da moreju biti morti i zadovoljni podjelom plijena. Malo su bili bolji, malo su bili prebrzi i preneodgovorni kaj su Kristuši znali kazniti i zeti si bodeka. Mame polek igrališta maksimalno zadovoljne i smirene, šank linija zadovoljna. Igrači zadovoljni, valjda.

Na kraju dana trebal je to biti derbi. Mučeniki preumorni od sobote navečer, poprilično nekompletni, nisu se nikak mogli odupreti Mišom koji su navalili kak gladni na nijof gol. Kad je Mišo dostigel radnu temperaturu, kad je Korda spustil roletu pred šestercem i kad je Damir tripu otpunul vručega zraka, ne moglo ni biti drugačije.